上海话的日常方言300句文字 上海方言閒话之

“腔调”，迭嗰词语勒拉辞海里向呃解释有得三种唻，第一种就是勒拉讲：戏曲曲调；第尼种就是勒拉讲：乐曲呃声律；第三种就是勒拉讲：嗰人讲閒话辰光呃语气搭语调。本人去过国内交关多呃城市，依照本人看唻，勒拉全国范围内，“最最讲究腔调”呃一群人要数上海人了，上海人所谓呃腔调就是指一嗰人言行举止呃总体表现！

“侬迭嗰人腔调覅要忒浓噢！”勒拉沪语閒话当中，假使去使用了覅同呃语气搭语调，就可表示出覅同呃含义唻，伊既可以去表示褒义含义跟意思呃，又可以去表示贬义含义跟意思呃。褒义呃含义跟意思是指侬迭嗰人长得交关帅气、而且还有得邪气好呃绅士范，“吾”老喜欢侬呃，侬本人感觉到了伐？！……贬义呃含义跟意思潜台词就是勒拉讲：侬迭嗰人修养是交关差劲呃，吾对侬蛮感冒呃！……

“腔调”迭嗰词语看起唻好像注重呃是外表，实际哴向，伊呃核心内涵也是腔调最最重要呃组成部分，而且两者之间还是缺一覅可呃。吾伲勒拉看待某嗰人呃辰光，首先映入到眼睛里向呃就是——迭嗰人呃面相了，即嗰人到底是长得哪恁样子呃，相貌灵光覅灵光。勒拉上海人看唻，假使某嗰人呃相貌长得是交关推扳差劲呃閒话，是用覅着去讲点啥呃，便会得压压较避避开，更覅大会得搭伊交流点啥噢！凡是有得迭种想法呃人，伊邪气容易忽略嗰人呃声相了，“声相”就是指“人呃声音”，实际哴向一嗰人声音呃好搭坏，就恁够影响到伊本人呃得跟失，千万覅要去小看了迭嗰小小呃得跟失，伊绝对足够左右嗰人迭嗰一辈子唻！吾伲覅是经常性会得去讲迭恁一句閒话，曰道：“未见其人，已闻其声！”勒拉成语当中覅是也有得“声泪俱下、声嘶力竭、先声夺人”……“腔调”勒拉上海閒话当中，有得邪气大呃一部分是搭声音有着交关大呃关系呃，由此可见，一嗰人声音呃好跟坏，对于自家呃整体形象是邪气重要呃。声音，或者讲嗓音呃大跟小、好跟坏侪都是与生俱来呃，有一些人天生就有得一副好嗓子，伊呃声音就好像是黄莺勒拉出谷；有一些人呃声音显得高亢嘹亮，讲起閒话唻声音生如洪钟；还有一些人生唻就是一嗰沙哑喉咙，讲起閒话唻，总归是哑哑呃；勒拉俗常生活当中，有一些长一码大一码呃男人，讲起閒话唻是细声细气呃……虽然讲嗰人呃嗓音是与生俱来呃，既是父母传畀吾伲呃，也是跟人体基因有关系，吾伲也是呒得办法去改变忒呃，但从更深一嗰层次唻讲，还搭嗰人呃修养跟品味息息相关。

勒拉俗常生活当中，吾伲常常性会得看到一些人衣着是邪气华丽考究呃、搭配也显得交关协调，但是一开口讲起閒话唻，却是显得交关粗俗覅堪，开口闭口就要标点符号满天去飞，伊习惯勒拉开口讲閒话呃前头、讲一桩事体之前，首先就是先要畀标点符号带出唻，假使覅先开口去讲讲各种标点符号，下面呃閒话就覅晓得哪恁去讲了，即使伊勒拉讲閒话呃辰光，语气搭语调再哪恁平和，畀人呃一种感觉就是——迭嗰人邪气缺乏修养、也显得太呒教养了，覅晓得伊拉呃爷娘是哪恁唻教伊本人呃；有一些人声音浑厚嘹亮，讲起閒话唻覅大欢喜去讲带有半点覅大文明呃各种閒话，但是勒拉腔调当中，总归会得透露出一股傲慢搭冷漠；亦有一些人勒拉讲閒话呃辰光，覅是“打着官腔”，就是畀吾伲呃感觉是勒拉“打太极拳”……讲迭种閒话呃人，就是勒拉出卖自家呃形象。本人是迭恁样子唻想并去认为呃，面对迭恁样子呃人，跟伊交流搭交往，顶顶多只会有第一趟仔，到了第尼趟再看到了伊，压压较避避开，绝对再啊覅会得跟伊交流交往呃，每趟仔碰面眼扳数会躲得远远呃，是覅会有人愿意与之长期交往呃！

诚然，要畀声音讲得悦耳动听搭音色呃好跟坏，是有着密覅可分呃联系呃，但是更为重要呃一桩事体就是，勒拉讲閒话呃辰光，一定要口齿清楚、吐字清晰，语气要谦和谨慎、落落大方而覅恁过于呃娇柔做作，还要等到别人家去讲好了，然后再接着别人家所讲呃话题接下去讲，而覅是开始就去喧宾夺主，抢先去发言，讲一些信口雌黄、侃侃而谈呃閒话，大有天底下呒有“吾”覅晓得呃事体一样呃。

另外，对于青年人唻讲，覅管是见工面试，还是搭女朋友约会，谈吐是邪气重要呃，即使自家呃普通閒话发音是覅大标准，也是呒得啥呃关系呃，最最关键呃一条就是——既要表现出自家交关自信呃一面，又要畀对方感觉到一份真情搭实意，嗰人只有迭恁样子去操作呃人，才会得畀大家留下美好呃印象，做起事体唻才恁事半功倍！

固然，声音呃音质是先天性呃，吾伲是呒办法去改变忒伊呃，但畀过，一嗰人声音方面呃腔调，是后天可以加以去培养呃。吾伲经常性会得去讲“声情并茂”迭嗰词语，却并覅是勒拉讲讲閒话呃人，伊本人呃音质是覅悦耳动听、是覅像电视台哴向呃主持人那样标准、是覅有得交关好呃风范，而是指迭嗰人勒拉讲閒话呃辰光，是覅有得足够呃真诚、是覅用真情跟实感唻打动所有呃人、是覅让所有呃人实实在在呃感受到了，讲閒话呃人是畀吾伲带唻了一份真情跟实意。

为啥勒拉沪上一档广播节目《滑稽王小毛》从1987年开播至今，一直受到广大老百姓呃欢喜，特别是每嗰礼拜天夜到头《王小毛信箱》，更是听众覅可缺少呃一道开胃晚宴，即使错过了首播，也要勒拉第尼天清晨重播呃辰光去补听，勿单单是迭恁样子噢，即使有覅少人昨天仔去听过了，到了第尼天早哴向有得重播呃辰光，还是会有得有交关多呃人去重听一遍，就是因为主持人葛明铭先生讲閒话呃辰光是邪气有腔调呃，几十年以唻，伊一直坚持讲实话、讲真话，讲呃侪都是老百姓呃身边事、搭老百姓休戚相关呃事体、为老百姓而一声呐喊……可谓是始终坚持如一，所以讲，讲閒话有得腔调是交关重要呃！

“声音”实在是忒重要了，因此令吾伲勒拉讲閒话呃辰光，覅得覅去注重礼节，勒拉打电话呃辰光也一样是覅恁去例外呃。既覅管是勒拉日常工作当中，还是勒拉自家呃屋里厢；也覅管是勒拉私企做生活呃，还是勒拉外企做生活呃；只要是凭电话里向讲閒话呃人呃声音，就可以对迭家企业呃企业文化、迭家人家呃文明程度略知一二。到了今早仔，覅管是家用电话，还是手机侪都是交关普及了，家家户户僎都有得一部电话，人人手里至少有得一部手机，但是电话礼仪却是交关欠缺呃。有一些人每趟仔拎起了电话（手机）就会大声去喊道：“侬啥人啊？！”嗰人为啥就覅恁委婉呃去讲：“吾是某某，请问侬是哪一位啊？！有得啥呃事体是吾可以效劳帮侬忙呃？！”……还有得一些人打错忒了电话，连得讲声对覅起也是呒得呃，就直接了当呃去畀电话（手机）挂忒了，更有甚者，既覅管是勒拉啥呃场合里向，也覅管人有得多少，明明一两分钟就可以去讲清爽呃一桩事体，就欢喜勒拉一旁边扯开大嗓门，叽里呱啦呃去讲了邪气长呃一段辰光。打电话呃辰光只恁是闻其声，而是看覅到伊本人呃，但畀过，伊极有可恁是一家企业、一嗰家庭呃窗口，从电话里传出唻呃声音，就好像是一嗰测试表，伊就恁够去看出一家企业呃文化、一嗰家庭呃教养，到底是哪恁样子呃、好覅好啊，因此坚决覅恁去小看腔调迭桩事体啊！

要想畀声音讲得悦耳动听、使任何一嗰人侪都恁接受，而覅至于让大家觉着讨厌，最最有效呃一嗰办法就是——勒拉讲閒话呃辰光，要尽量去降低自家呃音调，低到只要对方恁够去听清爽就可以了。多少年唻，国人一直就欢喜去采用大批判跟大辩论呃形式，讲閒话呃辰光，侪都欢喜扯开大嗓门去讲，也是覅去区分啥呃场合呃，就算条件好了，跑到外国去旅游了，也是迭恁样子呃，好像只要嗓门一大，底气就会变得足了，只要底气一足，讲閒话也就“全在理”了，伊本人会得去认为，其他人就覅敢唻欺负自家了，想要去欺负也就变得交关难了！迭恁样子呃歪理学说绝对是要覅得呃，也是素质推扳呃。

讲也是迭恁样子去讲呃，写也是迭恁样子唻写呃，真正恁够去做到呃人，到底又恁够有得几个人啊？！真可以讲是少之又少啊，包括本人也计算在内，也是一色似样也是迭恁样子呃，勒拉某些辰光里向，本人有可恁完完全全是可以去做到呃，有可恁自家忘记忒了以后，一点都覅恁去做到啊，从今早仔起要改正覅好好讲閒话呃毛病了。

文章写到了此地块，勒拉本人呃脑海里向突发奇想起唻了，有得一种邪气奇怪呃想法，如果勒拉中国呃梁山伯搭祝英台、勒拉外国呃罗密欧搭朱丽叶，侪都成双成对呃结为夫妇，做一对恩恩爱爱、令人羡慕呃神仙眷侣，去出现勒拉每一嗰人呃面前呃辰光，覅晓得到了伊呃辰光，吾伲又会得去采用哪恁样子呃一种腔调来面对伊拉？！

杜老倌侠客居（陆伟）写于2008年04月26日星期六上午

【补记：①迭篇文章是偶然勒拉书房清理覅需要呃物品时发觉呃；②人世间有得交关多讲覅清爽呃一桩事体，比方讲搭别人撞衫。本人搭沪上已故知名知性女作家程乃珊先生就撞了衫，只因勒拉2012年呃辰光，购买了程先生呃《上海素描》一书，恰巧里面也有一篇叫“腔调”呃文章，本人是嗰欢喜阅读搭写作呃文学爱好者，竟然也和先生写过类似呃文章，真呃是没想到。③要申明呃一桩事体是，有一些覅明就里呃人，看了文章以后准会得去认为是抄袭程先生呃文章！】

【备注：①文章为作者原创；②各种和上海有关的图片均来源于网络上；③感谢原创图片。】