快递小哥举动暖心世界大不同（上海闲话快递小哥）

养生书浪讲老年人早浪醒了覅急了起床，要醒醒睏。巧了，手机铃声响，一个年轻小伙子讲伊是送快递嗰。听说我还呒没起床就讲包裹放辣门口覅忘记。

“好嗰，谢谢侬！”

自从学会网购，我空下来就欢喜上网淘宝，各种好白相物事，吃嗰用嗰行情行市，赛过逛庙会，就算不买，瞄瞄也开心。前两日我下了一单云南菌子汤料。我去云南支过教，现在从山民手里网购点土特产也算尽一份爱心，所以尽管价钿勿便宜，我也爽气“支付宝”。

按云南卖家个讲法，山高路远，菌子可能要十天半个月到，我讲勿急。搿歇只过了一个礼拜，云南菌子就来啦？起床，快手快脚到门口，看到一只大塑料袋，四四方方，鼓鼓囊囊，捏上去软绵绵，不像是菌子。拿到窗口亮个地方一看，包裹浪向有“顺丰速运”货单，上头写“被子”。边浪还有二维码以及“寄付现结”四个字。咦，啥意思？屋里向被头交关，我肯定呒没买过新被头。

覅是网浪向骗子又出新花头！搿些骗子恶形怪状，有趟子电话里冒充老朋友问我借钞票，我当然呒没睬伊。假使我搿歇用手机扫二维码，勿晓得阿会上骗子个当……

哪能办？想了想还是拨刚刚来电话个手机。对面迅速回我电话，末脚关照我勿要拆包装，等伊晏歇回单位查清爽。

中浪向接到小伙子电话：“阿姨，侬阿是某某中学个老师？搿被头是退管会个礼物，侬放一百个心，收下来好了！”哎，原来是搿能介！听得我一阵感动。谢谢！

我打电话拨退管会个张老师表示感谢，张老师客气讲自家工作呒没做好，我讲是我自家开会辰光开小差了。半个月前，学堂退休教工“回娘家”活动，会浪肯定提到过嗰。

乃末我放心打开塑料袋，细腻个新疆棉花被香喷喷嗰！

下半日四点钟做夜饭，门铃响了。开门接过快递，正是云南菌子。快递员小伙子热情地讲早浪向个棉包裹就是伊帮我送来嗰。

“太感谢侬啦，做事体真仔细！哪能称呼侬啊？”我开心问伊。

“叫我小茅就好了！茅台酒个‘茅’。”

“好啊，忒谢谢侬了，小茅！”

冬天来了，暖心个事也到了！（许德华）